Pathian kan theihnak hi harnak kan ton caan ah kan thazang a si?

Vawlei ahhin kan dam caah kan nung lo i,  kan zawt caah kan thi fawn lo. Thih le Nun timi cu Bawipa kut ah a um mi a si. Bawipa nih a khiah mi caan a tlin tik ahcun dam zongah thih a si ko i, a phak rih lo ahcun zawt zong ah thih a si ve hlei lo. 

Cucaah, kan zawt ah siseh, kan dam ah siseh, Bawipa a nawlngeihnak cung ah khan kan thinlung dinhter ko hna uh sih. Zeicahtiah, kannih cu amah ta kan si caah le amah cu kan tuukhal a si caah, kan sin ah a um zungzal. 

Kan sin ah a ummi Pathian hmuh loin kan ton mi harnak lawng kan hmuh ahcun, number 12 i Israel miphun hna bantuk in, lungdonghnak hmun phak a fawi te. Zumtu hna nihhin Pathian hi kan theih tak tak ahau. Pathian kan theihnak hi harnak kan ton caan ah thazang a si khawh ahau, Hebrews 11 i zumtu hna bantuk in. 

Harnak kan ton tikah Pathian kan theihnak nih thazang a kan pek khawh lo, lungthawnnak le ruahchannak a kan pek khawh lo a si ahcun, van le vawlei sertu Pathian kan rak thei tak tak lo tinak a si. 

Zumtu hna, vawlei cung harnak, zawtnak, le thihnak lak ah lungdeihnak a kan pe tu cu zeidah kan ngeih timi ah khan si loin aho ta dah kan si timi ah khan a si. Phundang in chimh ahcun, Pathian kan theihnak ah khan a si. Zeizong vialte sertu Pathian hi ahodah a si timi kha kan hngalh caah cu kan hngalhnak nih cun thinlung dinhnak a kan pek. 

Theihnak paoh paoh nih hnangamnak a chuah pi kho lo nain Pathian theihnak nihcun hnangamnak a chuah pi. Cun, minung hi kanmah mit tein vawlei hi kan zoh ahcun kan thinlung aa din kho lo. Nain, Bible nih a kan pek mi mit in vawlei hi kan zoh tik ahcun thinlung aa din ko. 

Tuanbia bantuk in, zeitindah kan i thawk, khuaika tiang kan phan cang i, zeitindah kan dongh lai timi kha Bawipa nih a bia hmang in fiang tein a kan hmuhter cia cang caah a donghnak hmuh cia in vawlei ah kan nung i, zeibantuk thil le harnak kan ton ko hmanh ah, kan donghnak cu Pathian he zungzal in um ti a si lai timi kan theihnak nih khan, harnak le zawtnak lak ah lungdonghnak hmun phan kho loin a kan tuah. 

Biafunnak phun in kan vun chimh a si ahcun, hlan lio zumtu pawl Pathian an theihnak le bible nih thil zoh an thiamnak nih harnak le fahnak lakah tihnak ngeih loin Khrih caah nun a rak thiamter hna bantuk in kannih zong Pathian kan theihnak le bible in thil zoh kan thiamnak nih a kan thiamter ve awk a si.  Kan thiam rih lo a si ahcun, Pathian kan hngalhnak le a bia kan theihnak ah tampi kan than rih ahau tinak a si.