Khamhnak Thawngtha lawng lawng hi kan herh mi thawngtha a si maw?

Khamhnak thawngtha leng in thawngtha dang a um lo. Phundang in chimh ahcun, Jesuh Khrih thawng lawng lawng in Pathian he remnak hmuh a si timi lengin thawngtha dang a um lo.

Jesuh Khrih le a tuah mi (person and works of Jesus Christ), Khamhnak thawngtha lengin thawngtha dang a chim mi hna cu chiatserh si hna seh ti kha Bible nih fiang tein a kan hmuhsak (Galatians). 

Minung cheukhat nih kan herh mi thawngtha hi khamhnak lawng lawng a si lo tiah an chimh tik ahhin, khamhnak hi zeidah a si timi kha an i fiang tawn lo caah a si ve. Zeicahtiah, kan herh mi thawngtha an timi kha kum 70-80 i nunnak kong he pehtlaih in chimh mi a sinak nih a langhter. 

Mah nih fiang tein a langhter mi cu, khamhnak timi hi vailam cung i Bawipa Jesuh nih a tuah mi lawng  lawng kha a si tiah an rak ruah sual caah a si. Nain, hi bantuk cawnpiaknak hi Bible nih a pe bal lo. 

Khamhnak kan timi i a muru pi cu Bawipa Jesuh nih Pathian le minung remhnak caah a nunnak a pek mi cu a si tak tak nain mah lawng lawng kha a si lo. Bible nih fiang tein a kan hmuhsak mi cu, khamhnak kan timi cu Pathian a simi Jesuh nih minung sinak aa laknak ah aa thawk i, Jesuh Khrih voihnihnak a rat than tikah a dih te lai. 

Cu i a sullam cu, khamhnak kan timi hi hrinthan kan si hlan, kan si, kan si hnu in kan thih tiang aa peh mi a si. Zeicahtiah, taksa, thinlung, thlarau in a dihlak in khamh dih kan herh. Cucaah, khamhnak timi cu Jesuh a rat than tikah, zungzal nunnak pek kan si te tik ah khan a dih te lai. 

Mah hihi, theologians pawl nih (1) justification, (2) Sanctification, le (2) Glorification tiah a kan then piak. Justification timi cu Jesuh nih a thisen in biakamnak a kan serpiak mi ruangah fa ah a kan cohlan khi a si. Cun, Sanctification timi cu fa kan si hnu ah nikhat hnu nikhat Khrih mui lo chin lengmang in Thiang Thlarau nih kan nun a kan sersiam khi a si i, Glorification timi cu Jesuh a rat than tik i Bawipa nih a kan kamh mi vialte kha kan nunnak ah a tlinter te ding mi khi a si. 

Cucaah, khamhnak kan timi hi justification lawng a si lo. Justification, Sanctification, le Glorification tiang hi Bible nih a kan cawnpiak mi khamhnak kan timi cu a si. Cucaah, hi khamhnak thawngtha leng in kan herh mi thawngtha dang a um lo. 

Mah ruangah, khamhnak thawngtha lawng lawng hi kan herh mi a si lo tiah a chim tu pawl nih khamhnak thawngtha hi zeidah a si ti fiang tein an hngalh lonak kha fiang tein a langhter. Cun, Vancung pennak timi le khamhnak hna zong hi then phung an si lo. Zeicahtiah, aa khat mi te an si. 

Vancung pennak timi cu Pathian uknak ti khi a si. Cucu, Bawipa nih fa ah a cohlan (Justification) mi hna nunnak ahcun Thiang Thlarau kha pek cang hna i, an nun kha a uk cang hna caah chunglei nun Khrih mui lo chin lengmang in sersiamnak kha a thawk cang i (Sanctification), cucu Jesuh Khrih a rat than tikah lim a si te lai (Glorification) - Phil. 1:6

Khamhnak thawngtha lengin thawngtha dang a um lo. Phundang in chimh ahcun, Jesuh Khrih leng in thawngtha dang a um lo. Jesuh Khrih lawng lawng hi Pathian le minung remnak, kan thawngtha cu a si. 

Blessings.