Doctrine ah kan buai aw a si maw? 

Doctrine timi cu cawnpiaknak ti a si. Cucaah, doctrine ah kan buai awk a si lo timi cu doctrine ah a buai mi kan si hna. Zeicahtiah, Doctrine ah kan buai awk a si lomi timi kha doctrine pakhat a si ve. 

Cucu zei he dah aa lawh ti ahcun, "bia hman a um lo" ti chimh he aa lo. Bia hman timi hi a um lo a si ahcun biahman a um lo tiah kan chimh mi zong kha a hman ve lai lo. Zeicahtiah, a hman mi cu a um ti lo cu ta. 

Cucaah, Doctrine kan buai awk a si lo timi cu doctrine pakhat a si ve caah kan chimh lio ah khan kanmah kha doctrine ah a buai mi kan rak si diam. 

Mah lawng si loin, Bible nih doctrine ah buaiding in tamtuk a kan cawnpiak. Phundang in chimh ahcun, cawnpiaknak hman lo i ralrin, doh, le cawnpiaknak hman dirkamh kha Bawipa nih a kan cawnpiak. 

Cun, cheukhat kan pale nih doctrine vialte kan cohlan dih awk a si tiah an chimh mi zong hi bible ning a si lo lawng si loin ruahnak hrim hrim ah a si kho lomi khi a si ve. 

Doctrine vialte kan cohlan dih awk a si tiah a chimtu pawl nihhin doctrine vialte kan cohlan dih awk a si lo timi doctrine hi an pawm ve lo cuh. Zeicahtiah, bawmh dih ahau an ti i, bawmh dih ahau lo timi cu an pawm kho ve ti lo. 

Cucaah, doctrine vialte kan cohlan dih awk a si timi hna hi mifim bia a si lo. Bible he aa kalh lawng si loin ruahnak hrim hrim he zong aa kalh mi bia a si. 

Doctrine vialte hi kan cohlan dih awk a si timi cu vawlei cung biaknak vialte hi an hman dih ti chimh he aa lo. Vawlei cung biaknak vialte hi an hman dih kan ti ahcun an dihlak in an palh dih kan ti hna khi a si.

Tahchunnak ah, Christianity  nih Islam cu a palh a ti caah an doctrine zong aa khat lo i, cu bantuk cun, Islam nih Christianity kha a ti ve. Aa khat lo mi an hman ve ve kan ti hna ahcun an pahnih in an palh ti khi a si ko. 

Zeicahtiah, aa kalh mi cawnpiaknak le bia hi voikhat ah an hman ti kho lo. Tahchunnak ah, lai nawn hi sual a si timi le sual a si lo timi hi hmunk ah an hman kho ve ve lo. An hman ve ve ko kan ti ahcun a hman mi a um lo ti khi a si ve cang. 

Chimh duh mi cu, doctrine ah kan buai awk a si lo timi le doctrine vialte kan cohlan dih awk a si timi hna, vancung pennak ahcun doctrine vialte aa tlum dih timi hna hi Bible he aa kalh lawng si loin ruahnak hrim hrim he zong aa kalh. 

Vancung pennak siangpahrang a simi Jesuh hrim hrim nih doctrine hman lo i ralrin ding a kan cawnpiak lio ah, amah pennak ah doctrine vialte an i tlum dih timi cu zeitindah a si khawh hnga mu? Khrih a pennak ah doctrine an i tlum dih a si ahcun doctrine hman lo a pe tu prophet pawl kha ziah Bawipa nih cun biakam hlun ah a rak doh lengmang hna i, biakamthar zong ahcun zultu cu a rak dohter lengmang ve hna mu? Zeibantuk doctrine (cawnpiaknak) paoh cu cohlan ding kan si ko cu ta mu. 

Paul nih timothy fiang tein a chimh mi cu minung nih doctrine zei an rel lo caan, anmah theih duh mi a chim mi paoh an ngaih hna lai caan a phan lai a timi kha atu hi laimi zong kan phan cuahmah.

A donghnak ahcun, doctrine ah kan buai awk a si lo timi le doctrine vialte kan cohlan dih ding a si timi khuachia cawnpiaknak tiang kan phan ve cang. Kan i ralrin tak tak hna khi ahau. 

Doctrine ah kan buai awk a si i, Doctrine vialte kan cohlan dih awk a si lo. Bible he aa kalh mi cawnpiaknak vialte cu kan doh ahau, kan hlawt ahau i, bible cawnpiaknak kha biatak tein kan dirh kamh ahau. 

A donghnak ah, bible zong Pathian thawchuah hnawh mi a si tiah a pom ti lomi cu Khrihfa kan si ti lo. Kanmah tein Khrihfa kan si kan ti zong ah liberal theologians bantuk in mah le mah aa hleng mi kan si hna. Bible hi Pathian nih a phaun mi bia, thaw a chuah hnawh mi a si timi hi Khrihfa paoh nihcun pom lo khawh a si lomi doctrine, Bible cawnpiaknak a si. 

Tial lengmang ahcun a sua tuk lai kan peh than te lai.