Kan zumhnak le nunnak kong ahhin:

Ahodah nawlngeihnak sangbik a ngei lai?

Nawlngeihnak sangbik ah kan chiah mi hi zeizong vialte tahnak ah kan hman cang lai caah, nawlngeihnak sakbik kan pek mi kha a hman lo ahcun, kan tah mi viale ah kan i palh dih lai tinak a si. Cucaah, nawlngeihnak sangbik kan pek mi kha a biapi tuk. 

A cunglei kong he pehtlaih in school of thought kan timi pahnih, modernism le postmodernism kha kan vun chimh hmaisa hna lai. Kan zumhnak le nunnak kong ah zeidah nawlngeihnak sangbik kan pek lai timi biahalnak cu BIATAK (truth) kong he aa pehtlaih mi a si. 

Modernism nihcun biatak a um ti kha an zum i (objective truth), postmodernism nihcun Biatak a um ti kha an zum lo (subjective truth).  Postmodernism nihcun aa thleng lomi biatak a um ti kha an zum lo. Zeizong vialte hi kanmah le hmuhning, caan le chan a kal ning bantuk in aa thleng dih ti kha an zumh. Cucaah, tuni ah a hman mi zong thaizing ah a hman lo kho i, tuni ah a hman lomi zong thaizing ah a hman kho ti kha an zumh. 

Postmodernism ruahnak a ngei mi hna caah cun gender (Nu le Pa) hmanh hi fixed si loin fluid a si. Gender cu fixed a si timi, Nu le Pa lawng a si timi kha a si lo. Fluid a si i, cu i a sullam cu kan duh ahcun binary zong kan si kho, Nu zong pa kan si kho, Pa zong nu kan si kho i, gender pahnih lawng a um timi zong hi cheukhat caah cun 100 zong a um kho ti kha an zumh ning a si.

 Zeicahtiah, annih caahcun objective truth timi, aa thleng lomi biatak kha a um lo. Kanmah le hmuhning, pomining cio kha a si dih. A donghnak ahcun, lai nawn zong kha a a hman na ti ahcun nangmah caah a hman cang. Cucaah, hi bantuk ideology hi cu a si kho lo tuk mi kha a si caah kan vun hlawt chung lai. 

Cun, Modernism timi cu annih cu aa thleng lomi  biatak a um ti kha an zumh. Nain, mah biatak hi revelation in phuan mi kha si loin, minung nih kanmah ruahnak le fimnak hmang in hmuh a si an ti. Cucaah, naturalist an si i, supernatural he aa pehtlaih mi cu pakhat hmanh an pom lo. 

Modernist caah cun authority kha minung kan si i, postmodernism caah cun authority kha aum lo. Mah modernism philosophy hi Khrihfa biaknak ah German theologians pawl nih an rak luh pi tikah, cucu liberal theology tiah theih a si i, postmodernism philosophy hi Khrihfa biaknak ah an rak luh pi tik ah progressive theology tiah theih a si. 

Progressive theologians pawl le liberal theologians pawl nihcun, Bible BIA hi Bawipa BIA a si lo i, Bawipa nih thaw a chuah hnawh mi a si lo. Minung nih anmah hmuh khawh zat le pemh zat te an tial mi a si. Cucaah, Bawipa nih kanmah thluachuah peknak caah a hman khawh ko lai nain Bawipa nih thaw a chuah hnawh mi a BIA cu a si lo. Phundang in chimh ahcun, Bawipa BIA a si lo, ti kha an pom ning cu a si. 

A tawinak incun, inspiration timi Bawipa nih Thaw a chuah hnawh mi Pathian BIA a si timi kha an pom ti lo caah Bible i a nawlngeihnak kha an hlawt cang. Cucaah, Bible an rel tikah, Bible nih anmah hmuhning le ruahnak remhpiak si loin anmah tu nih an remh piak cang. Zeicahtiah, Bawipa nih thawh a chauh hnawh mi si loin minung nih anmah hmuhkhawh zat le pemh zat te an tial mi a si tiah an pom cang caah khan a si. 

Bible i a nawlngeihnak kha an hlawt cang caah nawlngeihnak sangbik cu, anmah ruahnak (opinion), duhnak (desire), le tawn mi (experience) pawl kha an si cang. Cucaah, Bible BIA in thil zoh si loin anmah ruahnak, duhnak, le tawn mi in zeizong vialte kha an zoh dih i, Bible nih thil zoh aa timh mi pawl kha kalsual, nawlngai lo, hmuhnak bi, tbt. pawl in sual an puh hna.

Phundang in chimh ahcun, anmah kha nawlngeihnak a sang bik a ngei mi an si. Anmah zumh mi a zum ve lomi, anmah pom mi a pom ve lomi hna kha cu an palh lawng si loin nawl a ngai lomi an si dih hna. (1) Bawipa bia in an cawnpiaknak zoh si loin an cawnpiaknak in Bible bia zoh a kan cawnpiak mi hna, (1) Pathian BIA hlawt ding ah a kan cawnpiak i, anmah bia cohlan ding ah a kan cawnpiak mi hna cu, cawnpiaktu hman lo an si hna. 

"Jesuh si loin kanmah  mipi nih uar ding ah bia a chim lengmang mi pawl cu cult leader kan si hna." - Peter Thang